सोनाब हालुराव खुसियै सफैनायसै,
हांसोआ बिखौ बारहोना गिदिँलांबाय
रायखसा हालुराव गिदिँबायनो हमबाय।
1054
खायज्रां बोराया बिरनो रोँगौ
रागा जोँब्ला हाजो दरसे गिसिखाहोनो हागौ,
बिनि बिसि खबारिया सानसेखालि
गथ’ जोनोम होनो सम जाबायमोन।
1055
सानसेखालि हा गुरैयाव गाब्रफ्लांना
खबारिया गोदो लांनायसै,
खायज्रां बोराया जोबोद दुखु जाबाय
बेसेबा दिखारजोँ बियो नागिरनायसै।
1056
बियो खबारिखौ एनजर गुदुं
खांख्राय गुदुं जेरावबो नागिरबाय,
मोनसे समाव खांख्राय रायखसा बिखौ
आखायाव हमथाना बिखा लानायसै।
1057
होनबा बोराया ओरैबादि रागा जोँनायसैदि
खांख्रायखौ बोनानै फिउ जोगार हरनायसै,
खांख्राया अब्ला सा हालुराव सहैबाय
बेबादिनो खांख्राया बेयावनो थानायसै।
1058
सानसेखालि आरोबाव मासे दाखु एनजरखौ
खायज्रां बोराया लोगो मोनबावनायसै,
बोराया बिखौ लानजायाव हमनानै
सोर फिदिँना सा हालुराव गारहरनायसै।
1059
बेसेबा गोबावनि उनाव बोराया
खुसियानि गुदुंआव सासे गथ’ मोनबाय,
खायज्रां बोराया बिखौ मोनमारैनो
बिसि खबारिखौ बावगार लांबाय।
1060
बिनि मोदोमा ओरैबादि रिमोनद्लादि
गथ’नि मुंखौ बोराय खुसिया दोनबाय,
गंसे जिलिदाबो बिनि मोदोमाव हाबा
गोसायै सौदावनानैनो द्लिन थाङो।
1061
हाजार हाजो आरो अन्थाइफोरजोँ
बिखौ होसिन्ना दोननो हाया,
मोनसे समाव खुसिया जोहोलावा देरनानै
सा हालुराव मैहुर खालामनो थांबाय।
1062
बोराया अब्ला दुखु जाफिन्नायसै
ग्रोम ग्रोम बिफां बारियाव बियो
खाफाल हमनानै बुरैखौ गोसो खांफिन्नायसै
बिनि दाहाया आरो फान्नै बारायबाय।
1063
बेबादि समावनो रोजासे सान गिदिँनाय
हाखो रायखसा बिखौ नुनानै बुंनायसै-
ओइ आबौ हामालै मिथिबाय
हामा दुखु जानो खोनादोँना?
1064
नै खोनादोँना खोनायाखै बोराय
आं जोबोद उखैनाय मोनसो गारदोँ,
आंनो जानो थाखाय आदार हर
दुखु दाजा होनबायसिन दुखु दाजा।
1065
बोराया रायखसनि मुंदांखा जानायखौ
रोजासे साननि सिगांनो खोनाबायमोन,
बुरैखौ रायखसा बोनानै लांनाय
बे समाव बोराया सिमां नुफुथारदोँमोन।
1066
बोराया रागा जोँनानै जोबोद गोसायै
रायखसनि उदैयाव खेबसे जोना होनायसै,
होनबा रायखसा गोबारै दुद्रुनायसै
बिफांआव सौदावना बिफांफोरा ब्रुनब्रुन गुनो हमबाय।
1067
रायखसाबो ओरैबादि रागा जोँनायसैदि
बियो फाग्लाथिया हाजोनिफ्राय
थरसे अन्थाइ रुजुन्ना लाबोनानै
बोरायखौ गोख्रैनो खुबैना होनायसै।
1068
बोराया गामसाखौ सारामाय खिथेबना
अन्थाइखौ थांखाव जोनानै होबाय,
अन्थाया गोख्रैनो गिदिँना थांनानै
हाजोआव उल्था सौदाव हैनायसै।
1069
फाग्लाथिया हाजोआ हुर हुरै
गोख्रैनो गिलुबालु गिसिखानो हमबाय,
हाजोनि बेसेबा बिफां आरो अन्थाइफोरा
बिसोरनि फारसे सोमोनांथाव दुद्रुबोबाय।
1070
साव साव बाना महरै दैया
गोख्रैनो बोहैबोनानै लोमसाव फैबाय,
बेबादिखौ नुनानै खायज्रां बोराया हांखुरै
अख्रां साजोँ बिरलां गारबाय।
1071
दैया गोदोनासे मोनबा रायखसा
जोबोद गिदिरसिन रायखसनि महर लाबाय,
बेसेबा गिदिर आरो दाहार दैया
बिनि आथिँ हान्थुसेल’ जाबाय।
1071
गावनि बिखाखौ बुनानै रायखसा
अख्रांआव जोमै मोफ्लाम होनो हमबाय,
बांसिन रागा जोँबावनानै बियो
अन्थाइजोँ खुबैना बोरायखौ जल्दब खोख्लैबाय।
1072
दै बानायाव जायख्लंजोँ फैनानै जमा
खुसियै सोर्गोआव लानानै थांबाय,
रायखसा दान्दिसे नागोमोनो हमबाय
बियो दैखौ बारनो नाजानायसै।
1073
गिलुबालु बानाया गासै जायगाखौ
लैथोमानि महर खालामनो हमबाय,
बिफां-लाइफांआ दै सिङाव थाबाय
जिब-जुनारफोरा दै सिङाव आन्दायनायसै।

Similar Posts

Leave a Reply

Your email address will not be published.