A Honey’s Weight
Content Her smallest fraction help
The Amber Quantity—
सुबुंफ्रा आथिँ मुसुरदोँसै
मुस्रि सोङै सोङै,
मेगना जायाखै मेसेबनाय आंनि
रिँनाय आर’जआ होआखै थेनथ’नाय,
नायै गोसोआ बिखायाव
रंजादोँ मोसानो बेयावहाय।
677
फालोसे उन्दै दाउफोरा
रंजा रंजा मानिबा खौरां-
आंनि लजिँनि आफांआव
बाज्ल’ बाज्ल’ मोसादोँ
जानो हागौ देरहासारदोँ गोरबोआ।
678
अख्रांआव जोँथि माथि मिनिस्लुनाय
समायना रमायना हाथर्खिखौ
आं सानब्लाबो सानख’नो हायाखिसै।
679
बुहुमाव उजिनाय
मानसि माहारिनि गोरबोआव
बेसेबांदि दुखु-दाहा दं
आं बिजिरब्लाबो बिजिरख’नो हायाखिसै।
680
बारआ बारबोदोँ गुदुं गुसु
बियो अननाय नेवसिनायनि
आं बिजिरख’नो हायाखिसै।
681
आं गाबनो गोनां जायो
हावरिया,
हाद्रिनि गोरबोआव जोनोम मोन्नाय,
हाद्रिनि फिसा आं
हाद्रि बादिनो सुखुआव बिरथिँनाय।
682
रंजानायनि गोजोन्नायाव मेँग्लियो आं
गाबनायनि बोदोराव लाजिनाङो
बे मादि आय’ जोनोम बेलाइ?
683
लैथोबादि गोसोनि गोथौ गियानाबो
बांग्रिँ जानानै फैयोब्ला
रानस्राव खराननि बुब्लियाव गसङो,
684
दैज्लां फैयोब्ला जुब जुब अखा हानानै
हाद्रिया हाब्रु जायो,
आंनि गोसो गोरबोआ
आं बिजिरख’नो हायै
हाद्रियाव हाब्रुआव गुस्लायगासिनो गुस्लायो।
685
नोरजिया बे सोलेरा
थिवरिया बे सान्नाया
बिजिरख’नो हाया आंनि-
आं थांना थानायखौ।
686
थांना थानो- सोरनि थाखाय?
मानो थांना थानो?
नाथाय-
मानो जोनोम आंनि?
687
मुलुगखौ आं नुबाय
मुलुगनि गासै उन्दै गिदिर
बेसाद,
जो जोला जिबिखौ
बायदि बायदि मुवाखौ।
689
नायहरो आं-
मुलुगनि समायना मिथिँगाखौ,
बेनो आंनि जोनोमा?
आंनि थांना थानाया?
690
आंनि अनजालिनि थाखायनो
आंनि थांनानै थानाय नामा?
आंनि अनजालिया सोर होनबा?
691
मिथिँगानि बिफां-लाइफां
मिथिँगानि जिबि जुनार
मिथिँगानि दैमा-दैसा
मिथिँगानि हाजो-हाला
मिथिँगानि दाउसिन-दाउला
मिथिँगानि एम्फौ-एनला बायदि
एबा मुलुगनि समायना मिथिँगायानो?
692
ना आंनि मेगना
ना आंनि महरानो
ना आंनि गोसोआ
ना आंनि रंजानायानो
ना आंनि गाबनायानो
ना आंनि जिउआनो?
693
मिथिँगानि बिफां-लाइफां
मिथिँगानि दैमा-दैसा
मिथिँगानि हाजो-हाला,
बिसोरो आंनि थांना थानायनि मुलि।
694
मिथिँगानि जिबि जुनार
मिथिँगानि दाउसिन-दाउला
मिथिँगानि एम्फौ-एनला बायदिफ्रा
थांनाय आंनि जिउनि लोगो।
695
बिसोर आंनि आंगो लोगो
बिसोरखौ आं अनो,
आंनि लोगोखौ आं जाया।
696
आंनि मेगना आंनि लोगो
आंनि महरा आंनि लोगो
आंनि गोसोआ आंनि लोगो।
697
आंनि रंजानाया आंनि लोगो
आंनि गाबनाया आंनि लोगो
आंनि गोजोन्नायानो आंनि थुलुंगा।
698
आंनि जिउआनो आंनि अनजालि
आं थांना थायो जिउनि थाखाय,
आंनि सोलेर हानि मुस्रि
जिउआ आंनि अनजालि।
699
नैबे मिनिनायाव
मिनिनाय मोखांनि खुसि,
सुदेम गुसु फुंआव।
700
माखासेया बिरलांदोँ
माखासेया रंजाबायदोँ,
गोदै मेथाइ खन्नाय-रोजाबनाय।
701
आंनि खोमायाव साबोन फेँफोना
रंजागारदोँमोन दान्दिसे,
दै लुबा गैबावलिया।
702
सोदोबा गोग्लै फैयो
आंनि बिखायाव,
सुहाबो खर’आव आंनि।
703
समायना मिनिब्ला
मेगनाबो हांखुर जायो,
सोलेरा रंजासिनो।
704
मोदोम बह्रा मायसालिखौ
मिनिसुलु बाराव मोसानाय,
समायना रमायना आं नुदोँ,
नैबे मोनाबिलियाव।
705
लामायाव दुं सान्दुंआव
थाबायदोँ आरो थाबायदोँ
आंनि गोसोआव गोजोना दंमोन।
706
गुसु सुहाबनाय दैखौ
जोबोद खुसियाव-
ग्रद ग्रद लोँदोँ आं
जिउमा गोजोन्नाय फोरमाय हरो।
707
निहोर गोग्लैयो,
दुब्रिया आजावो-
आङो जोथ्रोद फ्लाङो।
708
जोमै बिरनाय अखोरांआव
दाखा दाखा समायना,
फुरसब नायनो हायना।
709
नेना थादोँ फैसालि गोग्लैनायसिम
अखाफोर ज’हाबनाय खोमसि हराव,
हाथासि हार्सिँङै।
710
दिनैनि लामायाव
खोमसि फैसालिया साग्लोब फैयो,
हान्थिनाय लामायाव खोमसि जायो।
711
सोमखोर अख्रां-
नायनो समायना,
जायख्लंनि गाब दिनैनि।
712
मेँग्लियो-
बिजिरख’नो हाया,
बेजे आवरायनाय।
713
महर गोसा जोँमाया
आंखौ खुदुमदोँ,
नायदेरनो लाजिदोँ मेगना,
खेबसे मेसेबगारदोँ।
714
थर्ख-बिथर्ख
घोरोम सास्त्र बिसाराव
आं नुजाहैनो हायाखिसै,
गाबोन गेवलां मेलआव थांनाय जाथोँसै।
715
मेगन खाना
सांग्रेमाया,
आंनाव सौग्रावदोँ।
716
खोलो खोलो बारा बिलिरो
सुदेम सोलेराव,
रैसुमै मेथाइआ गोजोन होयो
निजोम आंनि गोरबोआव;
फुंनि नैबे दैसा सेराव।
717
सिउ सिउ सिउ
लामायाव खारनाय गाड़ीयाव,
समायना नुहरो आं नायहरो-
फैलाव माय दुब्लि।
718
मेगननि लांगोनायाव लामा
दोँसे गोलाव लामा,
बे लामाजोँ आंनि गोसो।
719
आं सिरि मोन्दोँ
जुब जुब अखा हानायजोँ
ज्राम ज्राम थिँआव रंजाब्ला।
720
खुसि आं जोबोद खुसि
नैबे सुदेम फुंआव,
दाउसिननि गोदै रिँनाय देँखोआव।
721
आंनि गोरबोआव रंजायो
दाउसिनजोँ बिरफायो,
फैलाव मायनि दुब्लियाव।
722
आं खन्थाइ लिरदोँमोन
समनि बिसम्बि नागिर नागिर-
आयआ गाबज्रि फैयो
ओँखाम जानो रैसुमै गारांङै।
723
मिनिनाय गोसो खुसिनि
नै आंनि गोरबोआव,
आखियो आं मोखांआव।
724
गुसु बोहैनाय दैसायाव
मेगन बिलिरो आं खुसि,
हाजोनि निजोरा बियो।
725
जिउआ आंखौ दुखु होयो
आंबो जिउखौ सोगाबो
जिउआ आंखौ रंजा होयो
आंबो जिउखौ गोजोन होयो।
726
आं थांना थागोन जिउनि थाखाय
जिउआबो नेना थागोन
आं थासान्दि।
727
गोबां थांबाय रंजानाया
गोबां थांबाय गाबनाया
आंनि थाखाय जिउनि गोजोन्नाय
जिउनि थाखाय आंनि गाबनाय।
728
सान्दुं फैबाय आंनि थाखाय
साया फैबाय जिउनि थाखाय
जोँ सानैजोँ बेखौनो रान्ना लाबाय।
729
सानख’नो हायै दिनै
बेसेबा बोथोर थांबाय
सानख’नो हायै दिनैसिम
बेसेबा सानफोरा थांबाय।
730
बिजिरख’नो हाया आं
बेसेबां गेलेबोखो बोथोरजोँ
बेसेबां रंजाबोखौ सानफोरजोँ
गेजेर गेजेर जोँ बयनिबो गेजेर
आं आंनि अनजालि जिउजोँ।