थांनांगौब्ला थांनानै थाथोँसै,
थैनायनिफ्रायथ’ रावबो बारग’नो हाखाया
खेबसेब्लाबो थैथारगोनखि थैथारगोन।
54
थैनायखौ रावबो हेव खालाम हाया
दिनै बे सेंग्राया आंखौ मा खालामो,
जेबो जेबो खालामथोँसै
बिनि आखायावनो आंनि जिउआ थाथोँसै।
55
नाथाय साव नांगोन आंनि
फाफ नांगोन बियो बेबादि खालामब्ला,
गोसोजोँ गोसो बेबादि सान्नानै
अरननि सेरावनो थाबाय रुम्बांआ।
56
दखनाखौ गोरायैल’ गानफामना लानानै
मेगननि मैखिफोरखौ-
आखायजोँ बोखारस्रांनानै लाबाय
बियो सानखौ खुलुमहरबाय।
57
जेब्ला साना सानजा दरखंनिफ्राय
लासै लासै नेनाय गैयै ओँखार बोनानै,
बिफां लाइफांआ गेवलांसारो
दुलाराइ अरननि दाउसिन दाउलाया आदार नागिरबाय।
58
जिब-जुनारफोरा जेरैबो
बयबो नागिरना आदार जाबाय,
उदै सुफुंनो थाखाय गिदिँबाय
रुम्बांआबो जोबोद ओँखाम उखैबायमोन।
59
नाथाय बहा ओँखाम मोनजालायखो?
सोर होफैगोन?
सोर लाबोगोन?
आरो बे अरननिफ्राय आं माबोरै गलांगोन?
60
गोबां बाथ्रा सानबाय रुम्बांआ
बियो गोसोजोँ सानबावबाय-
”आं दिनै बुथार जायाब्लाबो
उखैनायजोँनो थैसिगोन आं।’
61
नाथाय गोसोआव बेबादि
लोरबांथियै गोबां सानदोँब्लाबो,
उखैनानै थानांनायखौबो
रुम्बांआ सहायनो हायाखिसै।
62
”ओइ गुण्डा-
आं जोबोद ओँखाम उखैबाय,
आंखौ मिनिसिरि दैसासिमल’ दोनलांफिनदो
आं नोँनि थाखाय मायाव सोलिनो? ”
63
नाथाय अरना जेबो बुङाखै
बियो लाजिनाय मोन्नायजोँ,
मोनसे बेन्दोँखौ बोनानै होबाय
फांसे गेदेर आखि बिफांआ ग्लुब ग्लुब मावबाय।
64
सिरिया रुम्बांआ जोबोद गिदोँमोन
नाथाय दान्दिसे उनावनो,
माब्रै मोख्राया थालिर गोमोन
थाइगिर फिथाइ गोमोन लानानै फैबाय।
65
मोख्राफोरनि मिनिसुलु मिनि मिनि
लानजाइ सोमावनायखौ सोमोनांदोँमोन रुम्बांआ,
फिथाइखौ होनानै थांफिनदोँ
बेसेबा खुसिजोँ माब्रै मोख्रामोना।
66
थालिर गोमोनखौ अरना
सिरिया रुम्बांनो जासिबाय,
लोगो लोगो सिरिया रुम्बांआ
जोबोद रागा जोँनानै बुंबाय-
67
”बे थालिरखौ जानानै
आंखौ उखैगागोन सानदोँ नोङो?
जुनारफ्रासो जायो बेखौ
जुनारफोरनि थाखायसो बियो।
68
बेखौ आं जाया
आंखौ मिनिसिरि दैसासिम दोनलां,
नङाब्ला आंखौ थांनोल’ होदो
आं हार्सिँङैनो थांनो हागोन।”
69
अरना जोबोद लाजिनाय मोनबाय
आरोबाव सिरिया रुम्बांआ बुंबाय-
”नोँ मानसि नंगौना नङा?
बेबादि हाग्रा गेजेराव थानो?
70
आरो आंखौबो हाग्रा गेजेरावनो
बुद्रु बुद्रु लाबोगारबाय नोङो,
नोँ मा सानदोँ?
मा खालामनो सानदोँ?
71
आंखौ बुथारा मानो?
ना रसाफोनांनानैसो बुथारनो सानदोँ?
आंखौ जिनाहारि खालामा मानो
मा हास्थायदोँ अरन गेजेराव? ”
72
नाथाय मा सानदोँ
मा लुबैदोँ जेबो फोरमाया अरना,
बियो लासैनो गंस्रिना थाबाय
अख्रांखौ नायदाव हरबाय बियो।
73
रुम्बांआ सोँबावबाय-
”बेफोर मोख्राफ्रा नोँनि बान्दा?
एसेबां गोहो दं नोँहा?
जिराय जिराय उन्दु उन्दु बिसोरनि सायाव जायो?
74
नोँ मोख्रा फिग्रा?
ना मोख्रा फिग्रानि फिसाज्ला?
नोँ बे अरननि राजा?
जिब-जुनारा नोँनि बान्दा? ”
75
जेखिबुङा अरना सिरिल’ थायो
लाजियै लाजियै गंस्रिना नायदावो,
उनथाराव उखैनायखौ सहायनो हायैनि
थालिर गोमोनखौ मागा मुगा जाबाय रुम्बांआ।
76
थाइगिर फिथाइखौ मागा मुगायै
हाथाइजोँ अखा अखा जाबाय,
उखैनायखौ बेबादिनो दबथायबाय
फुंनि साना अब्ला बयनिबो थिखिनि मोनबायमोन।